Со исфрлање на зборот „коронавирус“ од туркменскиот речник во радикален потег за потиснување на сите информации за пандемијата, владата на Туркменистан ги става во опасност своите граѓани, велат „Репортери без граници“ (РСФ).
На државните медиуми веќе не им е дозволено да го користат зборот и тој дури е отстранет од брошури за здравствени информации дистрибуирани во училиштата, болниците и работните места, пренесува Туркменистан Хроникс, еден од ретките извори на независни вести, чија страница е блокирана во земјата.
Граѓаните, пак, кои надвор се движат со маски и зборуваат за пандемијата на Ковид-19 ризикуваат да бидат уапсени, велат новинарите со седиште во главниот град Ашгабат, кои известуваат за Радио Азатлик, разгранок на Радио слободна Европа на туркменски јазик.
„Туркменските власти ѝ останаа доследни на својата репутација со усвојувањето на овој екстремен метод за искоренување на сите информации за коронавирусот“, рече Џин Кавелие, шефица на бирото за РСФ за Источна Европа и Централна Азија.
„Ова негирање на информациите не само што ги загрозува најранливите туркменски граѓани, туку и го засилува авторитаризмот наметнат од претседателот Гурбангули Бердимукмамедов. Ја повикуваме меѓународната заедница да реагира и да го повика на одговорност за негово систематско прекршување на човековите права“.
Туркменските граѓани имаат пристап до многу еднострани информации за епидемијата на коронавирусот, додека, според надлежните, во Туркменистан досега не е откриен ниту еден случај. Претседателот, познат и како „Татко заштитник“, на 13 март нареди на јавните места да биде насадена традиционалната билка див седеф како „заштитна мерка“.
Новинарите меѓудругото известуваат и дека од затворањето на амбасадата на Туркемнистан во Москва на 17 март, многу државјани на оваа земја чекаат залудно на московскиот аеродром Домодедово, бидејќи немаат каде на друго место да престојуваат.
Последното рангирање на Индексот за слобода на печатот во светот на РСФ 2019, покажува дека Туркменистан е една од најзатворените земји во светот. Владата ги контролира сите домашни медиуми и продолжува да го засилува прогонот врз оние што тајно известуваат за медиумите во егзил. Малкуте корисници на интернет можат да пристапат до цензурирана верзија на интернет, обично во кафулиња, каде што прво мора да дадат идентификациски документ.




