Семејното насилство во земјите-членки на ЕУ се зголемило за една третина, откако се воведени мерки за борба против пандемијата, соопшти Комитетот за правата на жените на Европскиот парламент.
Од Комитетот ги повикаа земјите-членки на ЕУ и институциите на Унијата во Брисел да ја зголемат поддршката за жртвите на семејно насилство за време на кризата.
Откако многу држави воведоа забрана за движење, како една од мерките за спречување на ширење на вирусот, голем број жени остануваат подолго во своите домови и со тоа повеќе се изложени на потенцијално насилство, соопштија од Комитетот. Ова е причината зошто тие го сметаат овој период „особено опасен“ за нив.
„Сите сме соочени со големи психолошки предизвици во изолација или карантин, но жените од небезбедни домови, а понекогаш и децата се соочуваат со особено напорен стрес-тест“, рече претседателката Евелин Регнер.
Во Европскиот парламент додаваат и дека е многу тешко за многу жртви да повикаат помош затоа што сторителот што би сакале да го пријават е обично во близина.
Затоа, Евелин Регнер ги повика земјите членки на ЕУ активно да ги информираат граѓаните кои се изложени на насилство како и каде можат да добијат помош.
Овие мерки треба да овозможат лесно предупредување до полицијата и другите релевантни институции. Како што се наведува, тоа може да биде текстуална порака или употреба на шифрирани зборови, разбрани од лекари или фармацевти. Од земјите-членки исто така се бара да обезбедат повеќе засолништа за жени жртви на насилство.
Комитетот за правата на жените на Европскиот парламент дополнително предупреди дека економската криза се очекува да ги погоди жените посилно.
„Наше е да го зајакнеме физичкото и менталното здравје на жените и нивната економска независност дури и по кризата. Ние сигурно нема да ги оставиме жените во Европа сами“, порачуваат Европскиот парламент.




