Според најновите податоци, во светот со коронавирус досега се заразени 2.530.919 лица. Од нив починале 175.370 , а оздравеле 669.433 луѓе.
– Британските пратеници денеска се согласија за работа на парламентот во хибриден формат, додека трае карантинот, воведен поради пандемијата на коронавирусот. Само дел од пратениците ќе учествуваат физички на парламентарните седници, а повеќе од сто од нив ќе учествуваат од далечина.
Според британската Влада, денеска од Ковид-19 починале 823 луѓе, за разлика од вчера кога оваа бројка изнесуваше 449. Некои медиуми коментираат дека тоа што вчера биле пријавени помалку смртни случаи, се должи на доцнење во известувањето за жртви.
Во Велика Британија досега починале вкупно 17.337 луѓе. Ова значи дека земјата е четврта по бројот на жртви меѓу европските земји, зад Италија, Шпанија и Франција, со повеќе од 20.000 жртви. Најмногу жртви во светот има САД над 43.000. Исто така, Велика Британија има трета најголема стапка на смртност на светот од 13,1 отсто, а поголема стапка на смртност од неа имаат само Италија и Белгија. Сепак, според изјави на експерти, постојат знаци дека врвот на пандемијата во земјата поминал, а специјална комисија соопшти дека врвот веројатно бил на 8 април.
Министерот за здравство, Мет Хенкок, истакна дека функционира планот за забавување на ширењето на вирусот, но дека сè уште треба одредено време за да се видат вистинските резултати. Покрај тоа, тој најави дека в четврток почнува првото тестирање на луѓе на можната вакцина против коронавирусот.
„Даваме сè од себе за да создадеме вакцина. Велика Британија инвестира повеќе пари од која било друга земја за да пронајде вакцина“, забележува Хенкок.
Владата ќе инвестира 20 милиони фунти за клинички испитувања на „Оксфорд“, а тестирањето ќе почне на Универзитетот „Империјал колеџ“ во Лондон.
– Властите во Сингапур одлучија да ги продолжат мерките за делумна изолација за уште четири недели, откако во овој град-држава во изминатите денови се регистрирани илјадници нови случаи на коронавирусот. Вкупниот број на заразени изнесува 9.125, што е повеќе од која било друга земја во југоисточна Азија.
– Бројот на потврдени случаи на коронавирусот во Турција се зголеми за 4.611, и сега се заразени вкупно 95.591 лица. Вкупниот број на починати е поголем за 119 и сега изнесува 2.259. Во Турција од коронавирусот закрепнале 14.918 лица.
– Ирската Влада планира да забрани масовни собири до август.
– Националниот координативен штаб на Црна Гора даде согласност да се олеснат одредени времени мерки против ширењето на коронавирусот и граѓаните ќе можат да излегуваат до 23 часот, а продавниците ќе работат подолго.
– Данска, која постепено го укинува ограничувањата воведени поради Ковид-19, нема да дозволи никакви собирања над 500 лица до 1 септември.




