Вкупно 631 бескаматен кредит во вкупен износ од 4,7 милиони евра се одобрени преку „Ковид 1“ линијата на македонската Развојна банка, соопшти министерката за финансии, Нина Ангеловска. Во фирмите кои добија средства, како што посочува таа на својот Фејсбук профил, работат 5.588 лица.
Одобрените кредити по структура се 76 отсто за микро претпријатија кои имаат до 10 вработени, 22 отсто се однесуваат за мали фирми до 50 вработени и еден отсто за средни компании до 250 вработени. Од вкупно одобрените 4,7 милиони евра, 2,1 милиони евра легнаа на сметки на компании од транспортната дејност, 2,4 милиони евра за компании во сферата угостителство и 200.000 евра за фирми во туризмот.
Од денеска микро, малите и средни претпријатија од сите дејности ќе можат да аплицираат за новата линија бескаматни кредити „Ковид 2“ во висина од осум милиони евра, соопшти Ангеловска.