Сите опции кои ни се на располагање како општина Центар ќе ги искористиме, се што може да стопираме – ќе стопираме држејќи се до законите, вели градоначалникот на Центар, Андреј Жерновски на прашањето дали ќе им се даде градежна дозвола на инвеститорите на кои за само 3.296 евра на јавна лицитација по електронски пат, Министерството за транспорт и врски им продаде 2.855 метри квадратни атрактивно земјише во близина на Веро-центар.
„Стартната цена на лицитацијата била само едно евро и траела 15 минути, а фирмата која победила на лицитацијата ја зголемила цената за само десет денари“ образложи Жерновски.
Според него, 2014 ќе биде година на владините афери, а споредувајќи ја продажбата на земјиштата, Жерновски рече дека во Карпош земјиштето се продава за 100 евра а додека во Центар за симболично едно евро.
Тој надополни дека продажба на земјиште за толку ниска цена е нелогично – споредувајќи го со Веро центар, чија стартна цена на лицитацијата била 200 евра, а подоцна се искачила на 500 евра.
„Сега станува јасно зошто е во притвор претседавачот на општината. Не станува збор за некаков криминал во „Машинопромет“ туку се работи за тоа да немаме мнозинство и бидејќи не можеме да го преземеме уредувањето со градежното земјиште, да може Владата по богателни цени да продава земјишта со апашлук“, рече пред новинарите градоначалникот на Центар.
Тој побара Владата да го поништи процесот и рече, да им нареди на советниците од нивните редови, бидејќи според него така функционираат, да го изгласаат проектот на Жерновки и советниците – тие да го преземат уредувањето со земјиштето, бидејќи тие нема да продаваат по вакви „багателни“ цени.
Советникот Јован Тагасовски пак, потенцираше дека на два пати советниците на коалицијата на ВМРО-ДПМНЕ не гласале општина Центар да го преземе градежното земјиште од државата, како што е сторено во сите општини.
„Срамно е, во еден изминат мандат имавме исти ситуации кога за едно евро се продаваше метар квадратен. Граѓаните ако сакаат да дооформат градежно земјиште треба да платат по 700 евра за метар квадратен, а земјиштето се продава за само едно евро. Каде е логиката? Урбаната мафија тоа што го зацртала мора да го оствари. И овој хотел кој треба да се гради треба да е со кич фасади“, рече Тагасовски.
>> Министерство за транспорт: За каква афера зборува Жерновски
Изградбата на хотелот, кој е планиран да биде со седум ката, е предвидена со деталниот урбанистички план „Маџир маало“.
Површината за градење е 1.775 квадратни метри, а инвеститорот треба фасадното обликување на хотелот да го изведе во еден од стиловите – барок, класицизам, неокласицизам, романтизам и неоромантизам.
Купувачот е должен во рок од 15 дена од денот на завршување на постапката за јавно наддавање да ги уплати средствата, а доколку не го направи тоа ќе се смета дека градежното земјиште не е отуѓено.