Министерството за здравство денеска почна серијал дебати на тема „Концепт за изменување и дополнување на Законот за биомедицински потпомогнато оплодување заради воведување на можноста за добивање дете со помош на сурогат мајка“ кој се одржа на Универзитетската клиника за гинекологија и акушерство – Скопје.
Станува збор за концепт многу широко дебатиран во светот, кој не е воведен во Германија, Франција, но е воведен во Англија, САД, Холадија, Белгија, Русија, Канада итн.
Министерот за здравство Никола Тодоров истакна дека имаат предлог-концепт на закон кој сакаат длабински да го издебатираат со стручната јавност, но не само од медицински туку и од правен, етички и семеен аспект.
– Има два концепти на сурогат мајчинство-алтруистичко и комерцијално. Ние предвидуваме еден подвид на алтруистичко сурогат мајчинство и да можат да бидат исплатени определени трошоци на сурогат мајката кои се поврзани со нејзиниот живот за време на сурогат мајчинството односно трошоци поврзани за правилна исхрана, за лекување, прегледи итн. Имаме ограничување предвидено во концептот за висината на овие трошоци кои не може да бидат повисоки од една просечна плата исплатена месечно во стопанството во Македонија, издвојувајќи ги тука трошоците за преглед или за породување, рече Тодоров.
Тој појасни дека сурогат мајката има право да избере дали ќе се прегледува во приватна или во јавна здравствена установа и зависно од тоа трошоците треба да бидат покриени од страна на брачните другари.
– Подносител за сурогат мајчинство може да бидат само маж и жена кои се во брак и се државјани на Македонија, кои поминуваат еден период на психолошко и правно советување за целиот процес. Како мајка на детето се запишува жената која го има поднесено барањето за сурогат мајчинство. Има предвидено само еден исклучок од тоа-само во случај на смрт на двајцата подносители на барањето (мажот и жената) за сурогат мајчинство и само тогаш сурогат мајката има право да се запише како мајка и има родителско право и остварување на ова право согласно законот, додаде Тодоров
Учесниците на дебатата – стручни лица, експерти го поздравија почнувањето серијал дебати за разгледување на концептот за добивање дете со помош на сурогат мајка.
Тие укажаа дека треба да се прецизира горната старосна граница на жената која може да биде сурогат мајка, и дека треба да и се остави доволно време таа да размисли пред да одговори на барањето за сурогат мајчинство итн.