Навистина сме зачудени од изјавите на претседателот на Советот за култура на СДСМ, г. Алаѓозовски, и останатите членови на ова партиско тело кои упатуваат на дискриминација и фаворизирање во Годишната програма на Министерството за култура, се вели во рекацијата на Министерството за култура.
>>СДСМ резигниран од Националната програма за култура
– Го прашуваме г. Алаѓозовски, дали во овој контекст мисли на сопствените и проектите на останатите членови на т.н. Совет за култура на СДСМ, кои се дел од Годишната програма на Министерството за култура? Дали за своите проекти мисли, како што вели, дека не ветуваат врвен квалитет? Ако е така, го охрабруваме г. Алаѓозовски и останатите членови на овој Совет да се откажат од поддршката на Министерството за култура за сите нивни бројни проекти кои се дел од оваа програма. Воедно упатуваме дека е чесно и доблесно од нивна страна, во буџетот на РМ да ги вратат и сите останати средства кои во изминатите шест години ги добиваа за реализација на нивните проекти.
Министерството за култура уште еднаш потенцира дека Годишната програма за 2014 година е сериозно конципирана од страна на еминенти и стручни лица од сите дејности на културата, кои изработија програма која е квалитетна и издржана, без никаква дискриминација или фаворизирање по ниту една основа.
На крајот не можеме, а да не се запрашаме: Дали на СДСМ му беше потребна една цела недела по објавувањето на Годишната програма на Министерството за култура да подготви едно вакво соопштение кое е одраз на немоќта и безидејноста на оваа политичка партија? Или со други зборови, дали повторно, по којзнае кој пат се соочуваме со „Бура во чаша вода?“, реагираат од Министерството за култура.