Министерството за внатрешни работи со меѓународна помош ќе ги открива виновниците за сајбер нападот на интернет страната на Државната изборна комисија, што се случи на денот на изборите.
Во соопштението од МВР пишува дека:
„При анализата на податоците кои ги добивме од фирмата ДУНА КОМПЈУТЕРИ а се однесуваат на податоци и датотеки извадени од серверите (дата бази и логови од системите) за наша понатамошна анализа за можни проблеми со функционалноста на истите, не е утвредено нефункционирање на системите или застој во процесот на безбедносната афтентикација на корисниците за прием и внес на резултатите од изборните комисии.
Секторот за Компјутерски криминал и дигитална форензика во соработка со Јавното обвинителство ги користи сите механизми за меѓународна соработка со интернет сервис провајдери кои се надвор од наша јурисдикција, со цел добивање на податоци за корисниците на нивните сервиси.”
Од МВР информираат дека истрагата за овој случај продолжува во насока на утврдување на ИП адресите од каде што е пристигнат нападот, собирање дополнителни информации за да се утврди кој е нарачател на овој напад, како и дали имало други причини кои влијаеле или се поврзани со неможноста на објавувањето на прелиминарните резултати.
Во меѓувреме, Секторот за компјутерски криминал и дигитална форензика го извести Основното јавно обвинителство за сите активности преземени во насока на расчистување на случајот со нападот на интернет страницата на ДИК.