Драгољуб Ѓуричиќ, тапанарот кој дел од кариерата помина и како член на „Леб и сол“, почина на 68 години од последиците на коронавирусот. Тој бил примен на интензивна нега на клиника во Белград на 24 февруари.
Ѓуричиќ е роден во 1953 година во Цетиње и во рана младост почнал да свири рок музика, членувајќи во неколку групи во 1970-ите.
По две години во „ЈУ група“, во почетокот на 1980-ите се придружи на „Леб и сол“, со кој сними три албуми за период од три години: „Следовање“ (1982), „Калабалак“ (1983) и „Тангента“ (1984). Потоа премина во српската хард рок група „Кербер“, по што се врати во „Леб и сол“ и го замени Гаро Тавитјан на албумот „Путујемо“ од 1989 година.
Ѓуричиќ соработуваше и со „Ролинг стоунс“, Ѓорѓе Балашевиќ и Здравко Чолиќ.
Никогаш не се двоумеше да ги користи палките како алатка на протестите, па зеде активно учество во граѓанските демонстрации во Србија во 1996 година, предводејќи група од 30 тапанари. како и на митинзите пред изборите во 2000 година, на кои тогашниот претседател на Србија и Југославија, Слободан Милошевиќ ја изгуби власта.