Интензивирање на дијалогот со Северна Македонија ќе биде главен приоритет на бугарската Влада, најави новиот министер за надворешни работи на Бугарија Светлан Стоев.
Како што јави дописникот на МИА од Софија, според Стоев, ова е актуелно прашање за кое треба да се разговара.
„Прв приоритет ќе биде враќање на довербата и интензивирање на билатералниот дијалог меѓу Бугарија и Република Северна Македонија. Ние сме отворени за дијалог. Она што е потребно е постојаност, конструктивен став во дијалогот и можам да кажам дека целта е да се постигнат одржливи и неповратни резултати во воспоставувањето на довербата меѓу двете земји“, рече министерот Стоев.
Мониторингот од страна на ЕУ е гаранција дека билатералниот договор на Бугарија со Северна Македонија ќе биде спроведен, рече во петокот бугарскиот шеф на дипломатијата по средбите со португалскиот колега Аугусто Сантош Силва еврокомесарот за проширување, Оливер Вархеји.
„Се обидуваме да кажеме јасно, не само на македонската страна, туку и на нашите партнери, дека нашата политика е конзистентна. Предлагаме продлабочување и рестартирање на дијалогот. Втората точка на која се работи е враќањето на темата во рамките на нормалните европски формати, каде што за овие прашање треба да дискутираат земјите-членки на ЕУ и на Бугарија да ѝ се дадат гаранции дека билатералните договори ќе се спроведува во иднина. Овој мониторинг од страна на ЕУ е гаранција дека договорите кои се потпишани и кои треба да се потпишат ќе бидат имплементирани. Ова е стратегијата. Очекуваме конструктивен дијалог од страна на Република Северна Македонија“, рече Стоев, за бугарските медиуми.