Претседателот на Социјалдемократската партија на Црна Гора (СДП), Ранко Кривокапиќ, нема да го поддржи кандидатот на Демократската партија на социјалистите (ДПС), Филип Вујановиќ, на претседателските избори во земјата и ќе ги искористат сите правни механизми да ја оспорат неговата кандидатура за нов мандат.
Вујановиќ до сега на два пати беше избран за црногорски претседател, но постои дилема дали му се смета првиот мандат, со оглед дека Црна Гора тогаш се уште не беше независна држава.
Портпаролот на СДП, Мирко Станиќ, изјави дека оваа партија нема да го поддржи Вујановиќ од уставни и политички причини.
Од друга страна, претседателот на црногорската опозиција СНП, Срѓан Милиќ, изјави поддршка од неговата партија за Миодраг Лекиќ, претседател на Демократски Фронт, бидејќи ,,тој има најголеми шанси да го загрози кандидатот на владината коалиција.”
Претседателските избори во Црна Гора ќе се одржат на 7 април.