Педесет и четиригодишен скопјанец загина со велосипед, откако во него удрил автомобил денеска околу 10:30 часот на булеварот Кочо Рацин во Скопје. Според информациите од МВР, автомобилот го управувал 20-годишен жител на скопско Батинци.
По незгодата велосипедистот бил пренесен во Градската општа болница „Св. Наум Охридски“, каде од страна на лекар била констатирана смрт. Извршен бил увид на местото на незгодата од увидна екипа од СВР Скопје.
Од иницијативата На точак револтирани, излегоа со неколку барања до надлежните институции:
Сакаме Градоначалник на Град Скопје кој после секој изгубен живот во сообраќајот ќе најавува нова порадикална мерка во инфраструктурата, дизајнот на улиците и семафорскиот систем која ќе гарантира поголема безбедност. Додека не стигнеме до нула жртви, не направиле доволно.
Сакаме Министер во Министерство за внатрешни работи кој после секој изгубен живот во сообраќајот ќе најавува нова порадикална измена на Законот за безбедноста во сообраќајот и порешителна акција од полицијата против прекршителите. Додека не стигнеме до нула жртви, не направиле доволно. Сакаме Обвинителство кое правилно ќе ги квалификува овие злодела и нема да го привилегира неодговорното управување со 2-тонско возило како активност во која е дозволено да се греши. Одговорноста е еднаква како при управување со оружје. Сакаме Суд кој нема веќе да досудува условни казни за убијци. Сакаме новинари кои нема веќе да ги користат термините “незгода“ и “несреќа“ туку „убиство“ или барем „удар“/„судир“.Не се работи за гребнатинки и во 99% случаи не се работи за случки вон човекова контрола.
Во конкретниот напис добро е што се користи активна, а не пасивна реченица, реченица со одговорен субјект („го прегази 20-годишник“, наместо “беше прегазен од автомобил“).
Конкретната возраст и пол на возачот исто така е добро што е нагласена, зашто тоа е специфична група која е ризик по другите и по себе во сообраќајот и со која се работи на посебен начин, каков што сакаше да пренесе сообраќајниот психолог Ралф Рисер кога беше во Скопје, но не беше баш најсериозно сфатен од одговорните тука.
Овие барања се скромни и реални.
Луксуз е да продолжи губењето животи и да се третира со истата лежерност!
Правда за Б.Љ.(54), безбедност за сите!Во град не прифаќаме толеранција на жртви од сообраќај над НУЛА, при остварување на базичното право на движење.
Во населени места со соодветни брзини, инфраструктурни промени и полициска контрола бројот на жртви МОЖЕ И МОРА да се сведе на НУЛА.
Не прифаќаме ништо помалку од ВИЗИЈА НУЛА (Vision Zero) како дел од програмите за локални избори.
Кој не се стреми кон нула жртви, не е достоен да управува со институции.