Published: Tuesday, July 20, 2021 09:43
Претседателот Стево Пендаровски, по повод големиот муслимански празник Курбан бајрам, упати честитка до поглаварот на Исламската верска заедница, реис-ул-улема х. хфз. Шаќир еф. Фетаху и до сите граѓани од исламска вероисповед во Македонија.
– Најискрено посакувам празникот да го поминете, пред сè, во добро здравје, исполнет со радост, љубов и среќа. И годинава Курбан бајрам, во согласност со традицијата, нека биде во духот на помагањето и дарувањето, споделувањето и грижата. Да бидеме отворени и солидарни кон сите на кои им се потребни помош и поддршка не само за празничните денови туку во текот на целата година. Верувам дека Исламската верска заедница и сите нејзини верници, и понатаму посветено ќе придонесуваат за заедничката борба со сите предизвици коишто стојат на патот на просперитет на Република Северна Македонија, се вели во честитката на претседателот Стево Пендаровски.
Честитка до граѓаните, припадници на исламската вероисповед, по повод муслиманскиот празник Курбан Бајрам упати и Претседателот на Собранието Талат Џафери.
– Животот е чудо само по себе, меѓутоа, знае и да погоди силно. Ете, токму тогаш излегува на површина големината и силата на обединувањето и заедничкото делување на луѓето, каде и да се наоѓаат. Сведоци сме на ненадоместливите загуби од КОВИД-19 во последниве две години, меѓутоа и на бројните природни несреќи, несреќи кои предизвикуваат човечки и материјални загуби. Нека биде празникот на Курбан Бајрам, со сета симболика што ја носи во себе, само уште еден потсетник за сите нас, да го цениме животот, да се цениме и почитуваме меѓусебно, во секој миг, секој ден и на секое место. Да подадеме рака на поддршка и кон блиските, и кон далечните, и кон соседот и фамилијата, кон непознатиот и непознатиот, без разлики. Пред сѐ и над сѐ, ние сме луѓе кои имаат исти потреби и желби, исти права и обврски. Честит Курбан Бајрам!, се истакнува во честитката од претседателот на Собранието Џафери.
Денеска честитки упатија и премиерот Зоран Заев и претседателот на ВМРО-ДПМНЕ Христијан Мицкоски.
Величественоста на празникот Курбан Бајрам нè потсетува на суштината на човечкото постоење, на најскапоценото нешто за сите нас, на грижата за здравјето и зачувувањето на животот и грижата за најблиските. Нека биде празникот и поттик, во периодот што следи масовно да се вакцинираме како најефикасно средство во борбата против пандемијата со КОВИД -19 и така заедно да успееме најбрзо и најбезболно да се заштитиме и да ги пребродиме нејзините последици. Празникот на жртвувањето ни посочува вредности кои се универзални, ни испраќа благородни пораки што повикуваат на почитување и негување на нашето општество еднакво за сите, на општество во кое културните, етничките и верските различности се богатство и непроценлива уникатна вредност, се вели во честитката на премиерот Заев.