Даниел Кајмаковски е првиот победник на регионалниот „X-Factor“ кое суперфинале се одржа синоќа во преполна сала во Комбанк арена во Белград.
Уште од првата аудиција Македонецот уживаше огромна поддршка како од публиката така и од жирито, а синоќа по четири часа натпејување, Кајмаковски својот настап на шоуто од светски рамки го заврши со триумф.
Второто место и припадна на Тамара Милановиќ од Србија, додека третото на Босанецот Маид Хеќимовиќ.
Даниел доби парична награда и автомобил Мини Купер, а ќе му биде обезбедена и турнеја.
Веднаш по прогласувањето на победата Даниел одржа прес-конференција на која не можеше да ги скрие солзите радосници.
– Оваа победа им ја посветувам на своите родители, кои цело ова време веруваа во мене и ме поддржуваа. Ова е почеток на остварување на еден мој дамнешен сон. Верувајте премногу сум збунет и се уште не знам што понатаму, но едно знам, музиката е мојот живот. Сигурно ќе снимам албум, со мои и песни од други автори, ќе направам се да им помагам на младите таленти да се пробијат. Ме очекува турнеја низ Канада и Сад со Кики Лесендриќ и групата „Пилоти“, како и турнеја низ земјите на екс Југославија со учесниците на „Икс фактор“ – најави тој дел од своите идни планови.
Кајмакоски најави дека одлучил да си замине од Австрија и да се пресели во Белград, од каде ќе може почесто да доаѓа и во Македонија и целосно да и се посвети на музичката кариера.