Дебитанти во премиерата на комичната опера „Аптекарот“

На малата сцена во Македонската опера и балет, вечерва, ќе биде изведена комичната опера во три чина „Аптекарот“ од Јозеф Хајдн, во режија на Уши Хорнер од Австрија. Диригент е младиот Виктор Митровски. Тој првпат ќе настапи во МОБ.
– Направивме и внатрешна и надворешна аудиција, на која се пријавија студенти од сите факултети и ние одлучивме на кој ќе му дадеме улога. Во претставата ќе има и дебитанти што воопшто не стапнале на сцената. Сакаме да им дадеме шанса на младите и квалитетни кадри и тоа веќе го правиме – вели уметничкиот директор на Операта, Александар Kотевски.
Освен тенорот Дејан Стоев, кој ќе настапи во улогата на Семпоринио, на сцената ќе настапат и Билјана Ѓуровска како Грилета, Јане Дунимаглоски и Николина Јаневска. Сценографијата е исто така на Хорнер, а изборот на костимите на Марта Трендафилова.
– Станува збор за една весела и комична приказна, која веруваме дека ќе и се допадне на публиката – велат од МОБ.
Повторната изведба на „Аптекарот“ е утревечер. Во втората подела во главните улоги ќе настапат Зоран Даскаловски, Александра Лазаровска-Василевски, Никола Стојчевски.