Околу 40.000 илјади граѓани, поради истечена лична карта и неможност да ја обноват, се соочуваат со ситуација да не можат да ја подигнат пензијата, социјалната помош или да обават било каква трансакција.
Оваа состојба ја наметнаа измените на законот за лични карти по предлог на Беса со одложено дејство од 2023 година, а поради што се блокирани од Левица.
Во ваква ситуација Премиерот Заев, одговарајќи на новинарско прашање, денеска изјави дека им наложил на економските ресори да најдат начин да го стават целосно во функција животот на граѓаните со истечени лични карти , но и на оние кои за прв пат вадат лична карта.
-Овие денови сме принудени да бараме решение за сите оние граѓани апликанти за нова лична карта заради истечена или за првпат добивање лична карта или слично. Бројката е околу 40.000, рече Заев.
Овој проблем е подигнат и на нивото кое се става во контекст на претстојната статистичка операција Пописот и локалните избори, на кои може да се гласа со валиден личен документ од типот на лична карта или пасош. Во тој случај, ако граѓанинот нема лична карта а и пасошот му е истечен, не ќе може да го оствари своето граѓанско право на глас. На ова тема веќе се размислува во ДИК и во МВР.