ДПА синоќа одржа предизборен митинг во тетовската населба Тетекс 2 каде ги промовираше претседателскиот кандидат Илјаз Халими и кандидатите за пратеници од оваа партија во 6-та Изборна Единица.
Претседателскиот кандидат од ДПА,Илјаз Халими пред присутните тетовчани истакна дека е чест еден кандидат албанец да се натпреварува за претседател на државата.
„Ние не одлучивме случајно да излеземе со кандидат – Албанец, чест е за Албанците и чест е за сите нас. Јас сериозно мислам дека можеме во вториот круг. На Изборите во 2009-та сите албански партии имаа 280 илјади гласови, а македонскиот кандидат, после Иванов, имаше 230 илјади гласови и затоа мислам дека ние можеме да ги земеме тие гласови и да направиме промени во секој аспект” – рече Илјаз Халими.
Претседателот на ДПА, Мендух Тачи, меѓу другото, истакна дека ДПА има 90 илјади албански гласови дадени со срце и без ниедна дамка, а гласовите на другите се обични хартии кои ги крадат и за кои не гласаат луѓе.
Тачи исто така потенцираше дека опцијата што ја предводел тој и Арбен Џафери се обиделе трипати, со недозволени средства и војна, да ја уништат.
„ДПА беше погодена во 1997 год. со случајот на знамето, во 2001 година со востанието против ДПА. Ви велам пред камери Арбен Џафери рекол дека војната во 2001 г. е војна против ДПА за да се соборува од владата и третата војна за да се уништи ДПА беше во 2008 г. каде наместо оружјето се употреби уништувањето на гласовите на ДПА,каде 70 илјади гласови ги уништија заедно ВМРО, СДСМ и Али Ахмети. Оваа нивна војна не ќе беше успешна доколку немаше и предавници” – рече Тачи.
Тачи исто така се осврна и на лошата економска состојба во кои живеат Албанците доживувајќи секојдневни удари од инспекциите, УЈП, без инфраструктура и без универзитет и без ветените пројекти.
„Каде се милионските инвестиции во Тетово? 10 години на власт и 20 милјиарди донесени буџети и немаме одговор од Али Ахмети, колку отсто од овие пари од буџетите отишле кај албанците? Каде е библиотеката во Тетово? 6 години лажат дека ќе го направат амфитеатарот и сеуште го нема. Само лаги, измами и притисок врз Албанците”- рече меѓу другото Мендух Тачи на синоќешниот собир во тетовската населба Тетекс 2.