Премиерот Никола Груевски во завчерашното гостување во емисијата „Јади бурек“ на Сител 3 телевизија изјави дека вработени во министерството за финансии ја правеле изборната програма на ВМРО ДПМНЕ. Додека Груевски објаснуваше дека програмата се работела и ден и ноќ со сериозен пристап и дека тој самиот тие денови не правел ништо друго освен програмата, водителот Јанко Илковски искоментира „тешко на Ставревски ако нема пари за да се оствари програмата“, на што премиерот во обид да објасни дека нема опасност да се случи такво нешто потврди дека државната администрација ја работела изборната програма
„Он беше со цела екипа пресметки правеа на лице место. Значи он не беше сам беше со тројца четворица луѓе од неговото министерство што работат на буџет, што на дневна база го имаат чувството за буџетот, за приходите, расходите и така натаму. И тие и се менуваа по сектори, затоа што во буџетот има луѓе што работат на приме земјоделие, друг води образование, трет води друго, така што на секој сектор кога го работевме се менуваше екипата, така што два тројца остануваа со се, а секторски се менуваше“, рече Груевски.
Пред два дена НОВА објави дека службената веб страница на министерството за финансии се употребува за да се ставаат вести за изборната програма на ВМРО ДПМНЕ. Портпаролот на министерството не одговори на прашањата на НОВА. И денеска им поставивме прашање во врска со изјавата на премиерот дека вработени во министерството биле користени за ја пишуваат програмата, но не само што не добивме одговор, туку служеното лице за односи со јавност ни навести да не гаиме надежи дека случајно ќе добиеме одговори.
На првиот митинг на ВМРО ДПМНЕ во Охрид, репортерот на НОВА сними сведоштва со камера каде што вработени во администрацијата тврдеа дека ги пуштале порано од работа за да можат да одат на митинг.
Директното вклучување на администрацијата во изборната кампања беше дел и од забелешките на ОБСЕ/ОДИХР минатата година на локалните избори.
Злоупотребата на државни ресурси во кампања, како и „неможноста да се направи јасна граница помеѓу партијата и државата“ се дел од забелешките во извештаите на набљудувачката мисија на ОБСЕ/ОДИХР веќе неколку изборни циклуси.