Прелиминарниот извештај на ОБСЕ/ОДИХРод изборниот мониторинг за претседателските избори 2014 констатира дека иако изборниот ден поминал во мирна и демократска атмосфера, сепак, нотирани се голем неправилности, особено во делот на известувањето на медиумите и на проблемот на нераздвојувањето на партијата од државата.
“И покрај големиот број на медиуми, многу соговорници нотираа индиректна контрола на Владејачката партија врз медиумите поради нивната доминација на рекламниот пазар. Дополнително, недостатокот на политички анализи и независно истражување беше широко распространета појава. Од страна на засегнатите страни беше забележан феноменот на самоцензура. Мониторингот врз медиумите кој го спроведе ОБСЕ/ОДИХР покажа јасна пристрасност во известувањето во корист на владејачката партија ВМРО ДПМНЕ и кандидатот Иванов, Неуспехот на на јавниот сервис да обезбеди балансирано и рамноправно покривање е спротивно на параграф7.8 од документот од Копенхагег на ОБСЕ од 1990 година”, се вели во извештајот.
Телевизиите Сител, Канал5 и Алфа биле пристрасни во известувањето за Иванов. Ако тонот кон него бил воглавно позитивен, тонот кон Пенаровски бил воглавно негативен. Мониторингот врз медиумите забележал симптоматична содржина која била иста на сите три телевизии и која се повикивала на неидентификувани или анонимни извори. Телевизиите Алсат-М, Телма и 24 вести, според ОБСЕ, понудиле далеку побалансирано известување и доминантно неутрално претставување на Иванов и Пендаровски.
Во извештајот се забележува дека немало доволно политичко конфронтирање помеѓу кандидатите, додека за дебатата на МТВ1 се нотира дека „по дебата била организирана дискусија која воглавно била насочена кон грешките на Пендаровски“.
Иванов со најмногу реклами на телевизиите
Според мониторингот на ОБСЕ/ОДИХР, соодносот помеѓу кандидатите во политичкото рекламирање е следен:
–23 часа платена политичка пропаганда за Ѓорѓе Иванов
–7 часа платена политичка пропаганда за Зоран Поповски
–3 часа платена политичка пропаганда Стево Пендаровски
Притисоци врз гласачи и злоупотреба на државни ресурси
„Забележливо, кампањата на господинот Иванов беше силно поддржана од премиерот и другите министри кои исто така се кандидати за пратеници за парламентарните избори. Јасната поддршка на владата за кандидатот за време на кампањата не претставуваше во целост почитување на одвојувањето на партијата од државата, како што се бара со копенхашкиот документ на ОБСЕ од 1990, параграф 5.4. Сите кандидати, со исклучок на господинот Пендаровски беа придружуван за време на кампањата од лидерите на партии“, забележува ОБСЕ/ОДИХР.
Извештајот го нотира и проблемот со гласачите од Пустец, како и притисокот врз администрацијата од страна на владејачката партија.
„Дополнително, обвинувања за застрашување на кандидатите и злоупотреба на државните ресурси постоеја за време на кампањата. Долгогодишните набљудувачи на ОБСЕ/ОДИХР примија кредибилни обвинувања за притисок, особено врз администрацијата, кои вклучуваа: притисок за присуство на митинзи, понекогаш дури и во текот на работното време; притисок да се се присуствува на собирите на опонентите; ветувања или закани во однос на вработување во администрацијата; стимулации за гласање како социјални бенефиции; и партиски активисти копи бараат од јавните и државни службеници да обезбедат листа со идентификувани гласачи кои треба да гласаат за партијата на власт“, се вели во извештајот.