Во Белград, на 75 годишна возраст, почина познатиот актер и член на Југословенско драмско позориште, Милан Лане Гутовиќ. Како што пренесуваат српските медиуми, Гутовиќ починал на Военомедицинската академија во Белград, а информацијата за смртта ја потврдил неговиот син. Деновиве бил примен во болница по изненадувачкото влошување на здравствената состојба предизвикано од коронавирус. Погребот на Гутовиќ е закажан за сабота (28 август) во 12 часот, објави РТС.
Гутовиќ е роден на 11 август во 1946 година. Академија за театар, филм, радио и телевизија заврши во Белград во 1967 година. Беше еден од познатите „Бојанови бебиња“, заедно со неговите колеги од класата – Јосиф Татиќ, Светлана Бојковиќ, Иван Бекјарев, Ѓурѓа Цветиќ, Танасие Узуновиќ што беа примени од Бојан Ступица во редовен ангажман во Југословенското драмско позориште чиј член беше до 2002 година.
Во 2006 година станува првенец на Народниот театар во Белград, а кон крајот на 2011 година замина во пензија. Одигра голем број на театарски улоги од кои ќе остане особено запаметен како Камиј во „Болва во уво“ од Жорж Фејдо и како Владимир Недељковиќ во „Отворено море“ од Бранислав Нушиќ. А, повозрасните генерации го паметат неговото авторско кабаре „Обична вечер“ со кое го пропатува целиот свет и која е прва претстава што е играна на српски јазик на Бродвеј.
Филмска кариера започна во 1968 година, кога дебитира во остварувањето „Бегство“ на Радош Новаковиќ. Голема популарност на просторите на поранешна Југославија му донесе улогата на Среќко Шоиќ во „Тесна кожа“, а истиот лик го играше и во „Бел лаѓа“, која благодарение на неговата актерска креација беше една од најгледаните ТВ серии.