Претседателот на Здружението на новинари на Македонија за НОВА вели дека тие ќе поведат постапка пред Судот за човекови права во Стразбур откако вчера Уставниот суд ги одби двете барања за заштита на слободите и правата поднесени од шест новинари и од ЗНМ поради насилното отстранување на новинарите од собраниската сала на 24 декември 2012. Селмани вели дека засега ќе се воздржи од коментари за самата пресуда бидејќи се уште ја немаат добиено истата.
-Не можам да спротиставувам аргументи во моментов од проста причина што се уште не сме го добиле образложението од Уставниот суд. Откако ќе ја добиеме ќе ја разгледаме и ќе одговориме. Но, ситуацијата е чиста и ние не се откажуваме, овој случај ќе оди до Стразбур, категоричен е Селмани.
ЗНМ и адвокатот ќе чекаат да го добијат образложението и детално да го разгледаат, но, велат, за нив е чудно зошто Уставниот суд не ги поканил на расправата.
-Обично иницијаторите се канат на расправите. Оттука, мене ми е чудно зошто ние не бевме поканети, еве, ако не да учествуваме, барем да ја слушаме нивната расправа и аргументите кои ги изложиле таму. Тие ќе речат дека објавиле на нивниот веб сајт број од предметот со расправата, но тоа е број, не може да се каже дека тоа ја одразува волјата да не повикаат, вели претседателот Селмани.
Според информациите од Уставниот суд кои вчера ги објавија медиумите, барањето е одбиено оти судот проценил дека физичкото отстранување на новинарите од галеријата на собраниската сала настанало поради конкретна ситуација на ескалација на хаос и безредие, а целта била да се заштитат новинарите и да се обезбеди ред во салата.
Барањето за заштита на слободите и правата поднесено од ЗНМ е одбиено од процедурални причини, бидејќи подносител на такво барање можело да биде само физичко лице.