ДУИ изрази благодарност до Албанците за прифакањето на повикот „Не за едностран претседател“.
– Плебисцитарното НЕ на Албанците на 13 април беше надпартиски став, со кој тие покажаа голема свест за времето во кое се наоѓа земјата и предизвиците со кои се очекува да се соочи, изјави пред новинарите Бујар Османи од ДУИ.
Според него, кога на 13-ти рекоа НЕ за едностран претседател, Албанците не биле против никого во земјата, туку само покажале подготвеност да преземат одговорност за денешницата и за иднината на оваа земја.
– ДУИ цени дека нашиот став уште еднаш беше реафирмиран за одлучувачката сила на нашиот народ како државотворен народ во мултиетничката Македонија. Ние денес, само неколку дена по првиот изборен круг, сме горди дека ова плебисцитарно изјаснување ги сензибилизираше нашите сограѓани Македонци, вели Османи.
Османи надополнува дека Заев и Груевски покажале дека кај македонскиот политички камп секој ден се зголемува свеста дека математиката на бројките и мултиетничката политика не одат заедно.
ДУИ цени дека со појавувањето на лидерот на СДСМ пред неколку дена, кога побарал гласови од албанските граѓани е чекор напред, но недоволен за да се сфати правилно и прецизно идеата за консензуален претседател кој ја промовира партијата.
Кога Груевски ги афирмирал постигнувањата на Владата пред Албанците, секако било чекор напред, но недоволен. Постигнувањата кои ги афирмирал претседателот на Владата, Османи вели, се постигнувања кои се реализирани како резултат на спојување на две програми, на програмата на ДУИ и таа на ВМРО-ДПМНЕ во единствена владина програма.
ДУИ цени дека ќе биде многу разочарувачки ако тврдењата на македонските политички лидери имаат за цел да ги убедат Албанците дека тие се грижат повеќе за нив отколку самите тие или нивните политички претставници.
За Демократската унија за интеграција неприфатливи се тенденциите за воспоставување супремација во одлучување на една заедница во однос на другите заедници.
За ДУИ, право да ги презентира и брани интересите на еден народ има само субјектот кој го добил легитимитетот од народот а не оној кој има мнозинство гласови од друга заедница.
– Ние силно веруваме дека моќта на одлучување од 13 април ќе се одрази позитивно во подигањето на свеста кај македонските политички лидери за улогата на Албанците во нашата заедничка држава, надополни Бујар Османи.