Започнува 15-та Смоквијада, „најслаткиот“ фестивал во Македонија

А, на почетокот на септември, еве веќе 15-та година по ред, низ цела Гевгелија се разгоруваат огновите, се полнат тавите и низ воздухот се шири пријатниот мирис на смоквата. Доживување што можете да го имате само во Гевгелија во деновите додека се слави и почитува еден од најценетите специјалитети на регионот – слаткото од зрели смокви. Така ќе биде и оваа, 2021 година.

Здружението на граѓани „ТеРа“ годинава, од 6-ти до 8-ми септември, ја организира јубилејната, 15-та по ред Смоквијада. Приказната на оваа реномирана манифестација по која Гевгелија надалеку е позната, но и стана препознатлив бренд на градот, бележи повеќе од 200 учесника кои своите марифети во готвењето ги презентираа и промовираа пред гевгеличани.

За „Смоквијада“ информираа медиуми од земјава и од странство, но сепак во сите 15 години беше најважната цел: да се зготви најслаткото слатко од зрели смокви и да се зачува традицијата на предците

Гевгеличани знаат да кажат дека понудата за слатко од смокви во Македонија е голема, но гевгелиското слатко од смокви велат тие е најдоброто.

Тајната била во рецептот кој се чува со генерации, но сепак најважни биле смоквите кои во овој дел од државата имаат поинаков вкус поради самото поднебје и големиот број сончеви денови.

Овогодинешната Смоквијада ќе се одржи на поинаков начин од сите други. 10 екипи, составени од по два учесника во своите дворови ќе го готват слаткото од зрели смокви. Комисија ќе ги посетува екипите и ќе го следи процесот на подготовка на слаткото.

За да се следат сите екипи, варењето ќе се одвива два дена, односно во понеделник и вторник во попладневните часови, а на Денот на независноста на татковината, 8 септември ќе биде прогласено најдоброто слатко на платото пред Народниот театар во Гевгелија.