Лидерот на Сојузот на синдикатите на Македонија Живко Митревски ниту годинава не организираше првомајски протест. Тој не им се приклучи ниту на останатите синдикати и невладини организации кои организираа протести пред Собранието и Владата. Додека тие маршираа за работнички права, Митревски свика собир, односно прес конференција на плоштадот Македонија каде што изјави дека според него не бил потребен протести, туку „преговарања и договорања“. Тој истакна дека соработката со Владата била добра и се пофали со минималната плата како успешен проект на синдикатите.
-Покажавме дека и во Македонија може да се донесе Закон за минимална плата и тој не само што можеме да го имплементираме туку и да го унапредиме. Ги одбранивме во услови на најтешка економска криза трите основни столбови и не дозволивме масовни отпуштања, не дозволивме намалување на платите, не дозволивме зголемување на пензиската граница, рече Митревски.
Истовремено, пред Владата на РМ каде што протестираа другите синдикати, Здравко Савевски од граѓанското левичарско движење „Солидарност“ рече дека проектот минимална плата е, всушност, лага.
-Власта воведе минимална плата. За оние работодавци кои не ја почитуваат власта воведе, нормално, казна. Но, знаете ли што е казната? Ако некој работодавец не ја исплати минималната плата, тој ќе биде казнет со повик за едукација. рече Савевски и побара високи и висински казни и реално спроведување на реформата минимална плата.