Државниот јавен обвинител Марко Зврлевски на денешната прес конференција која беше свикана за да се промовира одделението за односи со јавност во обвинителството изјави дека ја примил кривичната пријава за аферата со мито „Македонска банка“, но одби да дава детали за пријавата, истакнувајќи дека обвинителот самиот проценува дали и колку од информациите во врска со одреден случај ќе ги сподели со јавноста.
-По однос на кривичната пријава можам да кажам дека е дадена на работа, односно земена е во анализа, а уште сега не можам да коментирам кои чекори понатаму ќе се преземат, рече обвинителот Зврлевски.
На прашањето дали ќе има кривична пријава за случајот со Загорац Тумбовски и обвинувањата дека тој давал кеш-пари на ВМРО ДПМНЕ, Зврлевски рече тие ќе го разгледаат случајот, но тој, според него бил „случај со низок степен на доверливост“.
Дополнително, Зврлевски објасни дека квалификацијата „низок степен на доверливост“ значела дека немале многу информации освен „вербални обвинувања на еден човек“.
Зврлески потврди дека обвинителството има случај и во аферата „Актор“ информирајќи дека сметките на компанијата повеќе не се замрзнати бидејќи штетата од тоа ќе била поголема.
Државниот обвинител не знаеше да одговори дали финансовата директорка на „Актор“ е во бегство или не, односно дали е достапна на органите на правдата.
Денешната прес-конференција државниот обвинител ја свика за да го промовира одделението за односи со јавност и именувањето на портпарол на државното обвинителство, чин кој според него, бил „историски“.