Владата во Романија падна откако владејачката централно-десничарска коалиција предводена од Флорин Кицу не го издржа гласањето на наедоверба во Собранието.
Опозициската левоцентристичка Социјалдемократска партија (ПСД) и екстремно десничарската Алијанса за единство на Романците (АУР) се приклучија во поддршката на иницијативата за недоверба на поранешните членови на коалицијата од Унијата за спасување на Романија.
Падот на Владата може да доведе до предвремени избори во Романија, кои се активираат кога на премиерот и неговиот кабинет ќе му биде изгласана недоверба двапати по ред од страна на пратениците. Тоа може да потрае со месеци, оставајќи ја земјата во неизвесност, а социјадемократите побараа избори што е можно поскоро.
Кицу рече дека „сите опции остануваат на маса“, вклучително и неговото останување на чело на малцинската влада, што би имала драстично ограничени овластувања во споредба со онаа што ја поддржуваат мнозинството пратеници.
„Ова е апсурдно. Кафка би бил горд“, додаде тој. Коалицијата се распадна минатиот месец кога реформаторската УСР ги повлече своите министри од владата поради несогласувања околу планот за трошоци за развој и правосудните реформи.
Политичката криза во Романија се случува во период на четвртиот смртоносен бран на пандемијата од коронавирусот.
Романскиот здравствен систем е пред крах поради недостигот на кревети во одделите на интензивна нега, бидејќи само околу една третина од возрасните примиле вакцина против КОВИД-19, а официјалните лица велат дека размислуваат да поднесат официјално барање за други земји да преземаат пациенти со коронавирус.
Во меѓувреме, порастот на цената на енергијата во Европа ја погоди и Романија, генерирајќи висока инфлација и стравувања за трошоците за живот.