Стево Пендаровски иако поканет во својство на гостин, сепак не е дел од конгресот на СДСМ. Тој во изјава за Дојче Веле ги образложува причините за ваквата одлука.
-Добив покана, но како што претходно веќе изјавив, сакам да останам дистанциран од денешните внатрепартиски случувања на Конгресот. Од тие причини решив да не присуствувам“, изјави Пендаровски за Дојче веле.
На конгресот на опозицијата кој е во тек досега дискутираа повеќе делегати – и оние кои му даваат поддршка на раководството на Зоран Заев и оние кои од него бараат оставка.
Досега, Есад Рахиќ, Митре Вељановски и Гордан Георгиев побараа оставка од Заев. Сите тројца сметаат дека тој нема капацитет да го води СДСМ. Поддршка на Зоран Заев и Радмила Шеќеринска им дадоа повеќе делегати од различни општини, како Свети Николе, Радовиш и други. Делегатите кои застануваат во одбрана на Заев велат дека тој е на чело на партијата само десет месеци, период за кој покажал исклучителна храброст и се конфронтирал директно со челниците на власта.
Зоран Заев кој на почетокот на конгресот беше дочекан со овации и скандирања од страна на делегатите според партиски извори во своето обраќање ги образложил одлуките за бојкот, зборувајќи и за притисоците врз опозицијата од страна на меѓународната заедница која постојано инсистирала на соработка со власта, но споменал дека со обелоденувањето на многубројните афери за власта како „Македонска Банка“ и директниот судир со Никола Груевски и Сашо Мијалков тој директно се изложил себе и своето семејство на ризик.