По вчерашната одлука на Владата за стопирање на градбата на Центарот за странци во Бардовци, министерот за правда Бојан Маричиќ денеска се сретна со жителите на Бардовци кои изминатиот период бараа тој објект да не се гради во нивната населба.
– Барањата на граѓаните се послушани. Верувајте, ова не беше ниту лесна одлука, ниту нешто што можеше брзо да се направи. Го завршивме успешно и по барање на граѓаните. Две министерства се задолжени да бараат нова локација вон населено место, така како што бараа граѓаните на Бардовци. Мислам дека е ова голема победа за граѓаните, но голема победа и успех и за Владата, затоа што Владата не може без граѓаните, ниту граѓаните без Вледата. Во овој дијалог имаа граѓаните дилеми, проблеми, стравови… Ние покажавме дека сакаме да ги слушнеме и дилемите и стравовите на граѓаните и не само што сакаме да ги слушнеме, туку сакаме и да ги уважиме и да донесеме соодветни одлуки за да имаат мирен и спокоен живот, и за да веруваат во институциите, рече министерот Маричиќ.
Тој додаде дека одлуката за стопирање на градбата во Владата вчера беше донесена едногласна од страна на членовите на Владата и на премиерот.
– Ова е успех на граѓаните, но без министерот и без Владата немаше да успееме и да го постигнеме овој договор. Министерот кажа сè. Голема поддршка до сите граѓани кои се бореа три месеци заедно со нас и што успеавме на крај заедно да склучиме договор и да ги надминеме сите овие препреки и да дојдеме до заеднички одлуки. Едно големо благодарам за министерот, рече претставник на граѓаните од Бардовци.