„Повторно сме во пик на пандемијата, каде што бевме пред една година“, рече на прес-конференција регионалниот директор на СЗО за Европа Ханс Клуге, пренесува АФП.
Тој истакна дека „моменталната стапка на пренесување на инфекцијата во 53-те земји од европскиот регион предизвикува сериозна загриженост“.
Според прогнозите, сегашната траекторија на инфекцијата ќе значи „уште половина милион смртни случаи од Ковид-19 до февруари“, додаде Клуге.
Тој посочи дека има зголемување на заболените во сите возрасни групи. Клуге го образложи зголемениот број случаи со „недоволната вакцинација“ и „олеснувањето на мерките против епидемијата“.
Стапката на хоспитализација е повисока во земјите со пониски нивоа на вакцинација, рече тој, додавајќи дека мерките како тестирање, следење, физичко дистанцирање и употреба на маски за лице сè уште се дел од арсеналот во борбата против вирусот.
Бројот на нови смртни случаи дневно се зголемува речиси шест последователни недели во Европа.
Во последните седум дена Русија е лидер со 8.162 смртни случаи, по што следува Украина со 3.819 смртни случаи и Романија со 3.100 смртни случаи, според АФП.