И по 10 часа, сè уште атмосферата во Собранието е напната. Неизвесноста и натаму владее околу тоа дали воопшто ќе има кворум за пленарната седница на која една точка е на дневен ред – гласање доверба на Влада. Во Собранието опозициските пратеници не успеаја ниту да го изгласаат дневниот ред, бидејќи нема кворум.
Причина за ова е отсуството на пратеникот од редовите на Движењето Беса, Кастриот Реџепи, а со ова падна и најавеното мнозинство на опозицијата. Собранискиот спикер, Талат Џафери стана од столчето и пред да почне седницата го повика потпретседателот на Собранието Фадиљ Зендели од Беса да ја води седницата.
– 10 минути пауза додека дојде потпретседателот. Имајќи предвид дека јас не сум поддржувач на иницијативата и нема да бидам 61-от тука, рече Џафери.
Лидерот на БЕСА, Биљал Касами пријави во полиција дека пратеникот Реџепи е исчезнат. А, по извесно време самиот пратеник се јави на социјалната мрежа „Фејсбук“. Реџепи преку видео обраќање порача дека е на безбедно.
Оваа информација го затекна лидерот на ВМРО – ДПМНЕ, Христијан Мицкоски, кој го најавуваше новото мнозинство кое ќе ја урне Владата. Според него, ова е трговија со пратеници и ќе размисли дали воопшто да се занимава со политика.
– Ако се потврди уште еднаш трговијата со пратеници, тогаш се поставува прашањето дали воопшто вреди човек да се занимава со политика во оваа наша Македонија, додека оваа власт предводена од Зоран Заев постои. Ова е срам, и ако се потврди тоа дека е држен надвор од своја волја и дека некаде се наоѓа, тогаш навистина тоа предизвикува едно силно чувство на гадење, рече Мицкоски.
Координаторот на пратеничката група на СДСМ, Јован Митревски, пак рече дека на Реџепи единствено притисок му правела опозицијата, а не власта. Тој кажа дека владиното мнозинство е стабилно, но и дека ќе расте.
– Имам обратни информации од она што го споделува опозицијата, а тоа значи дека притисоците кон него, се токму од нив. Очекувам Кастриот Реџепи во следниот период да излезе и токму да каже што е она што му се случувало. Знам дека тој е пратеник кој е за европскиот пат и за европската иднина на државата, рече Митрески.
Иако очекувањата на опозицијата беа дека иницијативата за доверба на Владата денеска ќе помине во Собранието, а најавеното мнозинство нема да биде нарушено, за тоа во скафандери дојдоа пратениците на ВМРО – ДПМНЕ, Никола Мицевски и Ангелика Петковска, кои и двајцата се позитивни на корона вирусот. Мицевски кусо прокоментира пред почетокот на закажаната седниаца.
– Следиме протокол, согласно протоколот на Комисијата за заразни болести, истото е случено еднаш и продолжуваме понатаму, рече во одење Мицевски.
Во меѓувреме, Мицевски и Петковска го напуштија Собранието и најавија дека повторно ќе се вратат, бидејќи протоколите наложуваат дека не треба повеќе часа да се носи скафандер.
Ако до полноќ не се изгласа недоверба на Владата, седницата се смета дека е завршена. Владата останува, а после дури за 90 дена ќе може да се испитува довербата на Владата. Ова го предвидува деловниот во случај доколку не се изгласа недоверба на Владата. Во овој случај, дневниот ред, барем засега, не е ниту утврден, што е најава за различни толкувања околу тоа кога опозицијата ќе има опција повторно да поднесе иницијатива за доверба на Владата.
С. И.