Новата влада која се „крои“ во моментов нема да донесе позначајни промени. Талат Џафери повеќе нема да биде министер за одбрана, додека Спиро Ристовски го напушта ресорот образование. Пазарот помеѓу ДУИ и ВМРО ДПМНЕ ги промени единствено овие ресори. Нов министер за образование според порталот „Алмакос“ ќе биде Абдилаќим Адеми кој досега беше министер за животна средина, а до 2011 беше вицепремиер за спроведување на Рамковниот договор. Се шпекулира дека нов министер за одбрана ќе биде Емил Димитриев чие име стана познато во јавноста летото 2013 кога Димитриев беше избран за нов генерален секретар на партијата. Претходно, од 2008 наваму беше заменик министер за одбрана.
Владата ќе ја задржи традицијата на позицијата министер за странски инвестиции да назначува нашинци од дијаспората со соодветно искуство во бизнисот. Нов министер веројатно ќе биде Горан Мицковски, финансиски експерт со долгогодишно меѓународно искуство кој во моментов работи во Лондон во Кредит свис (Credit Suisse AG) како консултант за инвестициско банкарство и стратегиски трансакции.