Автор: Михаил Мице Бошковски
За многумина несфатливо, нелогично и неразбирливо, еден толку славен и значаен композитор, да не се снаога со нотното писмо, туку само површно да се служи со него.
Тој својата музичка генијалност ја носел во својата глава, ја искажувал преку устата со пеење но никако не можел сето тоа да го усогласи со рацете преку клавирот со кој се служел многу скромно. Најмногу ги користел црните клавиши на клавирот специјално наштиман за него.
Но, генијалноста на Ирвинг Берлин не е во свирењето, туку во компонирањето и пишувањето на текстови за своите песни. Потеклото му е еврејско од денешна Белорусија. Роден е на 11 мај во 1888 год., а починува на 22 септември во 1989 во Њу Јорк.
Живееше 101 год., од кои 65 години му беа посветени на музичкото творештво. Вистинското име му е Израел Исидор Балин. Во САД, како 10-члено семејство (8 деца), се доселуваат кога Израел имал 5 години. Набргу останува без татко му и целото семејство живее во голема беда. Првин почнал да заработува како продавач на весници, потоа работел и како келнер-пејач во кинески ресторан, каде и го покажал својот талент, пеејки им на гостите.
Тогаш ги заработил првите пари за композицијата “Marie From Sunny Italy”, која била издадена на плоча. На корицата на плочата било погрешно напишано неговото име, наместо Балин, било пишано Берлин и така тој го прифатил тоа име.
За да напредува понатаму во кариерата, тој морал да најде човек кој ке ги нотира ноговите песни, па за свој партнер го зел клавиристот Тед Снајдер. Подоцна соработувал и со други музичари, но секогаш славата и заслугите си ги припишувал на себе.
Уште во првите години на 20 век Берлин веќе има големи хитови. Во 1911 година, во времето на водвиљот, ја промовира песната “Alexander’s Rag Time Band” која е прогласена за најголема лудорија на деценијата.
Била повеќе пати издавана: Со Беси Смит (1927); Луј Армстронг (1937); Бинг Крозби, Кони Босвел, Ал Џолсон (1947); Џони Мерсер (1945); „Реј Чарлс биг бенд“ (1959) и тн.
Веќе следната 1912 год. се жени со Дороти Гец, сестра на композиторот Реј Гец. Бракот трае кратко бидејки Дороти умира шест месеци подоцна од тифусна треска за време на нивниот меден месец во Хавана, Куба. Тагата за љубената Берлин ја искажува преку песната “When I Lost You”, која достига милионски тираж. Тоа беше неговата прва балада.
Вториот брак му носи бурна љубовна сторија со Елин Мек Кеј, ќерка на богат бизнисмен кој се противел на бракот. Сепак тие остануваат во брак 63 години и имаат четири деца, многу внуци и правнуци.
Се смета дека, компонираните музички творби и текстовите за нив се околу 1.500-тини на број. Некој од неговите биографи сметаат дека таа бројка е многу поголема, но факт е дека стотици од нив станале хитови и го направиле музичка легенда уште пред 1930 год. Берлин компонирал музика за 19 мјузикли и 18 филмови. Осум пати бил номиниран за Оскар.
Ја создал и песната “God Bless America”, патриотска песна која во Америка се пее во ранг на химна, па своевремено имало и предлози да се прогласи за официјална химна на државата. Еден од неговите поддршувачи вели дека било доволно во својот композиторски опус да ја создал само оваа песна, би ја имал истатa почит и слава.
Инаку, песната ја промовирал во 1938 година, а ја создал многу порано. Главна инспирација за оваа песна му биле зборовите на неговата мајка, која често повторувала „Господ да ја благосови Америка што не прими во своите прегратки и не избави од сиромаштијата и страдањата што го доживеавме“.
Меѓу успесите на Ирвин Берлин, секако, може да се вброи и податокот дека 25 пати бил на врвот на американската топ листа, а на неа се појавувал без број пати, со песни што ги пееле славни пејачки имиња како Френк Синатра, Барбра Стрејсенд, Линда Ронштад, Розмари Клуни, Дајана Рос, Бинг Крозби, Френки Лејн, Џони Реј, Ал Џолсон, Нет Кинг Кол, Били Холидеј, Ела Фицџералд и уште многу други.
За Ирвин Берлин многумина кажале убави зборови. На пример, Џорџ Гершвин рекол дека Берлин е најдобриот текстописец меѓу композиторите, а исто така славниот композитор Џером Керн кој зад себе има оставено прекрасни композиции, потенцирал дека во американската музичка историја нема место за Берлин, туку дека Берлин, всушност, е американската музичка историја.
Сепак, за негов најголем успех се смета песната “White Chrismas”, во интерпретација на Бинг Крозби од филмот “Holiday Inn” (1942). Песната доживува огромен успех и се смета за најпродавана плоча на сите времиња чиј тираж се зголемува секоја година пред Божикните празници. За оваа песна Берлин добива Оскар за најдобра оригинална мелодија. Во 1954 година е снимен истоимен филм.
Долг е списокот на хитови што ги создал Берлин по кој се снимени филмови. Еве некои од нив: “Puttin’ On The Ritz” (1929); “Top Hat” (1935): “Carefree” (1938): “Alexander’s Regtime Band” (1938): “Ester Parade” (1948): “There’s No Business Like Show Business” (1954) и други.
По повекегодишна пауза, во 2001 год., Ирвинг Берли повторно се најде на првото место на американските топ листа кога Селин Дион ја сними „Господ да ја благосови Америка, непосредно по терористичкиот напад на кулите близначки во Њу Јорк.