Починал параглајдерист од Унгарија кај кампот Љубаниште, пред околу еден час, како што изјавуваат за НОВА очевидци од кампот кои го виделе параглајдеристот кој вртоглаво паѓал надолу.
Тој бил вплеткан во опремата и повикувал за помош кога паднал во водата, после што локалните туристи влегле во езерото и го извадиле телото со чамец.
Според нивната изјава, младиот параглајдерист бил свесен кога го извлекле од водата.
– Го ставивме на чамецот и не го помрднувавме телото ,бидејќи не знаевме какви повреди има. Тој беше свесен додека ја чекавме Брзата помош- кажа дека е од Унгарија, си го кажа името и дека боледува од ретка болест, за да им пренесеме на лекарите за да внимаваат какви лекови ќе му одредат- вели за НОВА Ива, скопјанка која поседува викендица во Љубаниште.
Мештаните и камперите револтирано раскажуваат дека чекале точно 45 минути за да дојде Брзата помош, и тоа од Охрид, затоа што во околните туристички места нема ниту доктори, ниту амбуланти.
– Само што дојде Брзата помош му ставија некакви инјекции, но тој веднаш почина.
Една од медицинските сестри дури негодуваше како да влезе во водата за да стигне до чамецот, а притоа да не се намокрела, и после 5 минути откако најде камен на кој можеше да стапне, реши да му помогне на повреденото момче, но беше предоцна.
Срамота е во туристичко место да нема никаков доктор, никаква амбуланта. Нема лекар ниту во Пештани, во Љубаниште нема веќе подолго време, во Св. Наум исто така не можевме да пронајдеме, па така Брза помош дојде дури од центарот на Охрид.
Срамота е како после ова да ни доаѓаат странски туристи. Една пчела да те касне ако си алергичен нема да преживееш, нема најобична амбуланта, велат за НОВА очевидци на настанот.
НОВА пред две недели објави сторија на дописникот на НОВА од Охрид, Мики Трајковски, во која беа истакнати проблемите со отуство на лекари во туристичките места.
Ве молиме кликнете на овој линк за сторијата на Трајковски, објавена на 1 јули.