По паузата на седницата, претседателот на Советот на Општина Центар Мирослав Шиповиќ во ходникот разговараше со претставниците на медиумите кои од него побараа повеќе информации, како и негови толкувања за тоа што содржат двата спорни ДУП-ови Тасино Чешмиче и Градска Четврт-Капиштец.
-Јас не знам што точно предвидува ДУП-от за Тасино Чешмиче, односно Водно бидејќи јас единствено се грижам тој да биде во согласност со законите, бидејќи јас не сум урбанист. Исто така не е точно дека со овој ДУП ќе се овозможат 400 илјади нови метри квадратни градежно земјиште на Водно, не сум видел но тоа е лага, им рече Шиповиќ на новинарите.
На прашањето на новинарите дали негова единствена грижа е ДУП-от само да е во согласност со Законот или меѓу другото да соодвествува и со интересите на граѓаните, Шиповиќ повтори дека тој не е урбанист и додаде дека тој самиот бил на Водно за да се увери дека земјиштето не се лизга.
-Вчера бев на Водно, таму веќе се е изградено и јас не видов дека земјиштето се лизга, а предупредувањата од научната јавност дека земјиштето се лизга и е опасно за градење се стари од 2008 година, еве ви кажувам јас баш вчера бев таму, рече Шиповиќ во разговорот со новинарите на паузата.