Се договоривме украинската делегација да се сретне со Русите без претходни услови на украинско-белоруската граница, во реонот на реката Припјат, соопшти кабинетот на претседателот на Украина Володимир Зеленски.
На официјалната Фејсбук страница на Зеленски пишува дека ова е резултатот од разговорот со белорускиот претседател Александар Лукашенко, и оти Лукашенко ја презел одговорноста дека од „моментот на заминувањето, преговорите и враќањето на украинската делегација“, сите авиони, хеликоптери и ракети поставени на белоруска територија ќе останат во мирна состојба.
Русија веќе испрати во Белорусија официјални претставници на разговори.
Руските трупи и денес продолжија да се борат со украинските одбранбени сили и војници за контрола на Киев и други градови, четврт ден од руската инвазија на Украина.
Најновото соопштение доаѓа откако рускиот претседател Владимир Путин нареди да се стават во специјална готовност „оружјата за одвраќање“ на земјата, без конкретно да се спомене нуклеарното оружје.
-Врвните лидери на водечките земји на НАТО дозволуваат агресивни изјави против нашата земја, затоа му наредувам на министерот за одбрана и на началникот на Генералштабот да ги стават силите за одвраќање на руската армија на посебен режим на готовност, рече Путин.