– Вие сте баталјон и единица на Армијата на Република Северна Македонија, обучени за справување во секоја ситуација и со сите предизвици. Учествувавте во гаснењето на пожарите уште еднаш потврдувајќи ја пожртвуваноста за застанување во одбрана на својата татковина и на граѓаните на државата, рече во обраќањето до баталјонот, заменик – началникот на Генералштабот на Армијата, генерал-мајор Азим Нуредини честитајќи им го 28-от роденден на најелитните специјални сили.
На церемонијата организирана во касарната „Илинден“ , се обрати и министерката за Одбрана Славјанка Петровска која му го честита на баталјонот 28 –от роденден.
– Вие го потврдивте мотото на Баталјонот на специјални сили на Армијата на Република Северна Македонија „Секогаш и секаде први“. За борбената подготовка сте први и први ги совладавте 7-те нивоа на физичка спремност и борбена готовност. Ја поминавте и интероперабилноста согласно НАТО стандардите, рече Петровска која информира дека нивната спремност и подготвеност повторно ќе биде промовирана на почетокот на наредниот месец.
– Продолжете по патот на успехот, вие кои гордо ја носите униформата на армијата на Република Северна Македонија и секогаш сте подготвени во служба на граѓаните, рече министерката за Одбрана Славјанка Петровска.
На роденденот на баталјонот на 5 војници од единицата „Волци“ им беа доделени златни значки.
(М.Т.)