Агресијата на Русија врз Украина и моментната соостојба таму биле во фокусот на средбата што американската амбасадорка Јури Ким ја остварила со албанската министерка за Европа и надворешни работи Олта Џачка, амбасадорот во ЕУ, Луиџи Сореца и со украинскиот амбасадор Володимир Шкуров, јави дописничката на МИА од Тирана.
На средбата тие изразиле заедничка поддршка посочувајќи дека „САД, ЕУ и Албанија се на страната на Украина“.
– Заедно со Олта Џачка и Луиџи Сореца ја изразивме нашата солидарност и поддршка на амбасадорот на Украина, Володимир Шкуров за неговата земја. САД, ЕУ и Албанија и другите земји ширум светот стојат заедно и решително бараат Русија да ја прекине нејзината однапред смислена, неиспровоцирана и неоправдана инвазија на Украина, напиша Ким во објава на социјалните мрежи.
Таа посочува дека САД ќе продолжат да работат со сите партнери и сојузници во поддршката на Украина во нејзината самоодбрана.
– САД ќе продолжат да работат со сојузниците на ЕУ и Албанија и другите партнери за поддршка на Украина во самоодбраната. Ние, исто така, ќе продолжиме да преземаме конкретни мерки, вклучително и санкции без преседан, за руската влада и официјални лица одговорни за нивните постапки, посочува амбасадорката Ким.