автор: Михаил Мице Бошковски
Од многубројните италијански доселеници во САД, се изроди уште една ѕвезда – Кони Френсис. Родена е во Њу Џерси на 12 декември во 1938 г. како Кончета Роза Марија Франконеро.
Музичкиот талент го покажува уште од најмала возраст кога под влијание на нејзиниот татко Џорџ почнува да свири на хармоника и да пее. Идејата на татко и не била таа да стане пејачка ѕвезда, туку да ја совлада хармониката и кога ќе порасне да не биде зависна од мажот туку да има свое училиште за хармоника.
Кончита и татко и Џорџ Франконеро
Но, уште при првите настапи како дете, ја забележуваат некои музички продуценти. По нивна препорака го менува името во Кони Френсис и ја става во втор план хармониката и целосно се посветува на пеењето. Името Кони Френсис го прифати само како уметничко, додека роденото, официјално не го промени.
Првата плоча ја снима на 17-годишна возраст за дискографската компанија МГМ. И не само првата туку и наредните седум не предизвикуваат интерес кај публиката.
Тогаш се запознава со Боби Дарин (1936 – 1973), во тоа време, еден од најпопуларните поп пејачи и автори во САД. Покрај соработката, меѓу нив се развива и страсна љубов, која наидува на отпор кај конзервативниот италијанец – таткото на Кони Френсис.
Тој сметал дека, со оглед на годините, прерано е таа да се врзува за еден човек, па уште кога слушнал дека сакале да побегнат заедно, се решил на радикален чекор.
Земал оружје и му се заканил на Боби Дарин дека ќе го убие ако не ја прекинат врската. Боби Дарин се исплашил и љубовта завршила. Во тоа време и компанијата МГМ била готова да го раскине договорот, бидејќи и покрај осумте издадени синглови немало никакви резултати.
Тогаш, по предлог на нејзиниот татко таа снима една стара песна од 1923 г. „Who’s Sorry Now?“. По една ТВ презентација, за кратко време песната станува многу популарна, достигнува милионски тираж и освојува четврто место во САД и број 1 во Англија. Тогаш Кони Френсис има неполни 20 год. и за кратко време, со својот милозвучен емотивен сопран кој на моменти е на границата на плачот, станува една од најпопуларните пејачки во САД. И како што обично бива, во наредниот период се редат хитови и успеси, па и учество во неколку филмови.
Во една прилика настапува и пред англиската кралица Елизабета Втора. Од хитовите вредни за одбележување се: „Stupid Cupid“ (1958 г., бр. 1 во Англија), „My Happiness“ (1959 г., постара песна првпат публикувана во 1948 г., бр. 2 САД, бр.4 Англија), „Mama“ (1960 г., познатата наполитанска песна на Чезаре Андреа Бицио која стана светски хит испеана и на англиски и на италијански), „Everybody’s Somebody’s Fool“ (1960 г., бр. 1 САД), „My Heart Has A Mind Of It’s Own“ (1960 г.,бр. 1 во САД и бр. 3 во Англија и „Don’t Break The Heart That Loves You“ (1962 г.,бр. 1 во САД).
Во наредниот период интересот за Кони Френсис спласнува поради напливот на британските групи на чело со „Битлси“ и „Ролинг стоунси“, но таа редовно издава тематски албуми со италијанскa, хавајскa, кантри, шпанска и друг вид музика и воедно настапува по луксузните ноќни клубови, се до крајот на 60-тите.
Потоа, извесен период се повлекува. До тука, може да се каже дека нејзината кариера се одвива добро. Но, во 1974 г. и се случува една многу непријатна сутуација, кога по еден настап престојува во еден мотел, каде што е нападната, претепана, ограбена и сулувана.
Тоа многу негативно и се одразува не само на кариерта, туку воопшто во животот, бидејќи долго време е во депресија и под постојана психијатриска нега.
Разбојникот не беше пронајден, а таа ја тужеше компанијата што го имаше мотелот за недоволна безбедност на собата, бидејќи било констатирано дека бравата не била исправна.
По долг судски процес успева да добие три милиони долари оштета. По инцидентот, цели седум години не се појавува на сцената, а истовремено има проблеми со претходно нестручно напрвената пластична операција на носот, па извесен период останува без глас.
На личен план има четири неуспешни бракови. Сите траат многу кратко. Очигледно љубовта кон Боби Дарин во младоста оставила длабоки траги. Во една своја изјава тоа и го потврди велејќи дека прекинувањетона врската со Боби Дарин ја смета за најголема грешка во животот.
Во 1981 г. кога конечно собра сили повторно да и се врати на музиката и се случи уште една трагедија. Нејзиниот брат Џорџ Џуниор, беше брутално убиен.
Од 90-тите год. на минатиот век Кони Френсис повторно со мали прекини е повремено активна. Во кариерата, се претпоставува дека снимила околу 2.000 песни од кои 500 биле популарни во разни земји по светот. Пееше на 13 јазика: англиски, германски, италијански, француски, шведски, грчки, јапонски, холандски, португалски итн.