Ивана Трајчева, Марија Ѓоргева, Валентина Беслимовска, Сузана Мирческа–Кузмановска и Енѓулуше Кадриу–Леши се петте обвинители на кои им беше истечен мандатот и денеска повторно беа избрани во конкуренција на десет обвинители за гонење организиран криминал. Во тимот на обвинителката Вилма Русковски влезе обвинителката Трајчева која претходно беше оценета со висока оценка, а која го застапува предметот „Софтвери“ во кој е обвинет поранешниот генерален секретар на Владата Драги Рашковски. За обвинители за организиран криминал конкурираа и Златко Биковски, Елизабета Јосифовска, Наташа Сарамандова, Имран Османи, Арсим Адеми, но не го добија потребното мнозинство гласови од Советот на обвинители.
Зад реизбраните обвинители застанаа десет члена на Советот, па така обвинителката Трајчева и Беслимовска добија 10 гласа „за”, а Ѓоргева, Мирческа-Кузмановска и Кадриу-Леши добија поддршка од девет гласа „за”.
Претседателот на Советот, Антонио Јолевски, по седнциата порача дека можеби во иднина треба да почне да се размислува за избор на нови и млади кадри во Обвинителството за организиран криминал поради нивната напорна работа.
Републичкиот јавен обвинител, Љубомир Јовески, истакна дека ќе ги поддржи досегашните обвинители затоа што станува збор за професионални и самостојни обвинители кои со успех ги извршуваат доверените работи.
– Тие постапуваат по многу сложени предмети и нивно евентуално неизбирање ќе значи пролонгирање на тие предмети – рече Јовески.
(С.М.)