Според пријавеното, тие и рекле, исто така, дека се овластени од градоначалникот и дека во негово име бараат да поднесе отказ
Денеска (21 март ) во 10 часот и 45 минути, 45-годишната Т.Л. од Тетово во СВР Тетово пријавила дека на 18 март годинава околу 15 часот С.С. (44) и В.А.(33) од Тетово телефонски ја повикале да дојде во просториите на Општина Тетово и откако влегла во една од канцелариите тие и соопштиле, односно побарале од неа, без никакво објаснување, во писмена форма да даде отказ од директорската функција во тетовско средно училиште, најдоцна до 21 март 2022 година.
Според пријавеното, тие и рекле, исто така, дека се овластени од градоначалникот и дека во негово име бараат да поднесе отказ. Пријавителката Т.Л., според пријавеното, напоменала дека од 9 март минатата година кога со решение била избрана на директорската функција немала добиено никакво известување за некаков пропуст или грешка во работењето. Се преземаат мерки за расчистување на случајот.
Се обидовме да добиеме појаснување за случајот од Општината Тетово, но ниту еден од телефоните на веб-страницата не е во функција.