Германија го опиша барањето на рускиот претседател Владимир Путин за плаќање на енергенсите во рубљи како „раскинување на договорот“. Путин истакна дека Москва повеќе нема да прифаќа плаќања во долари и во евра за испорака на гас за Европската Унија (ЕУ).
„Таквото барање „значи раскинување на договорот“. Сега ќе разговараме со нашите европски партнери како ќе одговориме на ова барање“, изјави министерот за економија, Роберт Хабек на прес-конференција во Берлин.
Владимир Путин денеска најави дека Русија нема повеќе да прифаќа плаќања во долари и евра за испорака на гас за ЕУ, давајќи им на руските власти една недела да изготват нов систем во рубљи. Рускиот претседател објасни дека тоа е дел од одговор за замрзнување на рускиот имот на Запад поради офанзивата во Украина.
Германија е екстремно зависна од рускиот гас, кој сочинува 55 отсто од нејзиниот вкупен увоз. Наспроти руската инвазија на Украина, рускиот гас се уште пристигнува во ЕУ. Берлин, сепак сака брзо да ја намали зависноста од рускиот гас, барајќи негови алтернативи.