автор: Михаил Мице Бошковски
Еди Фишер стави свој печат на 50-тите години на минатиот век. Интерпретираше популарна музика која во тоа време добро пронаоѓаше на пазарот.А и тој самиот беше талентиран и умееше да и се додвори на публиката со исклучителниот шарм, милозвичниот баритон и привлечниот изглед. И не случајно имаше голем успех кај жените. Меѓу другото, промени пет жени од кои три се славни личности во сферата на филмот и музиката.
Еди Фишер е роден на 10. 8. 1928 г. во Филаделфија, Пенсилванија. Родителите му се руски емигранти од еврејско потекло. Роден е како четврто од вкупно седумте деца во семејството. Вистинското име му е Едвин Џек “Еди “ Фишер. Уште од детството го носи прекарот „Сони Бој“, по една песна на Ал Џолсон.
Со музика, поточно со пеење, се занимава уште од тинејџерските години. Учествува на разни фестивали и избори за млади пејачи, на кои обично победува.Со локална популарност се стекнува кога настапува во оркестрите на саксофонистот Чарли Вентура (1916 – 1992) и оркестарот на тромбонистот Бади Мороу (1919 – 2010).
Но, многу позначаен за него е настапот во шоуто на Еди Кантор (1892 – 1964), во тоа време познат актер, пејач, композитор и влијателна личност во американскиот шоубизнис. Учеството во неговата шоу емисија обезбедувало договор за снимање за дискографската компанија RCA Victor (Радио Корпорација на Америка) специјализирана за издавање на популарна музика, џез, блуз, бродвејски изданија и др.
И кога веќе е на стартот да отпочне вистинска музичка кариера, го ангажираат во армијата на САД како пејач во воениот оркестар. Една година престојува и во Кореја. По демобилизирањето од армијата нагло пораснува неговата популарност со настапи во најлуксузните и најпознати ноќни барови и со учество во свои шоу програми на радио и ТВ.
Од тој период најпозната е неговата петнаесетминутна емисија спонзорирана од компанијата „Кока кола“ – „Време е за кока и Еди Фишер“, која трае четири години. Гледаноста на програмата е фантастична, првенствено затоа што Еди Фишер го покажува својот талент и како шоумен, а спонзорите се восхитени и му нудат договор вреден милион долари за да биде портпарол на компанијата.
На музички план исто така има фантастични успеси. Со четири хитови е на прво место: „Wish You Were Here“ (1952), „I’m Walking Behind You“ (1952), „Oh! My Pa-Pa“(1953) и „I Need You Now“ (1954). Или вкупно 17 хитови на топ 10 и 35 хитови на топ 40.
Во екот на најголемата своја слава за првпат се жени со Деби Рејнолдс, славна актерка, пејачка и танчерка, која зад себе има импозантна бројка на успешни филмови. Ќе го споменеме само „Singin’ In The Rain“ (1952). Бракот трае од 1955 г. до 1959 г. Од тој брак се родени Кери Фишер, (актерка, сценаристка и писателка позната по улогата на принцезата Леја во филмот „Војна на ѕвездите“, во 80-тите за кратко беше мажена за Пол Сајмон) и Тoд Фишер (крстен според Мајк Тод, најдобриот пријател на Еди и воедно сопруг на Елизабет Тејлор). Мајк Тод е познат филмски и театарски продуцент.
Ненадејно загинува во авионска несреќа во март 1958. Веќе следната година Еди Фишер се разведува од Деби Рејнолдс и се жени со Елизабет Тејлор (1932 – 2011). Тоа не само во Америка туку и во целиот свет одекна како првокласна сензација. Јавноста беше изненадена од потегот на Фишер да се ожени со вдовицата на својот најдобар пријател.
Тој брак траеше од 1959 г. до 1964 г. Потоа Фишер се ожени со уште една славна личност – Кони Стивенс (1938 – ), актерка и пејачка со која има две ќерки Џоли и Триша. И двете се занимаваат со филм и музика.
Со четвртата сопруга Тери Ричард живееше многу кратко, а со последната Бети Лин најдолго – од 1993 до нејзината смрт во 2001 г.
Бурниот брачен живот на Еди Фишер му се одрази на кариерата. Публиката која му се восхитуваше, почна да го презира, особено по бракот со Елизабет Тејлор. Во 70-тите и во следните две децении сними малку материјал. Тоа што се продаваше беа неговите компилациски албуми со хитови од 50-тите.
Последните години од животот патеше од несоница и беше зависник од медикаменти за спиење. Своевремено имаше проблеми и со дрогата. Умре во 2010 г. на 82 години како последица на компликации по хирушката интервенција на скршеницата на колкот во Беркли, Калифорнија.