Командантот на руската војска, Сергеј Рудској најави дека Русија ќе се фокусира на „целосно ослободување“ на Донбас, подрачје на истокот на Украина во кој се наоѓаат проруските сепаратистички региони Доњецк и Луганск.
Руското Министерство за одбрана објави дека Русија разгледувала две опции за својата „специјална воена операција“ – една се однесувала на цела Украина, а втората на Донбас.
Коментарите на рускиот воен командант, кои ги пренесуваат руските државни новински агенции, сугерираат дека Русија би можела да ги намали своите апетити во Украина. Руските сили наидоа на жесток отпор во северниот дел на Украина и околу Киев.
Рудској, кој е началник на главниот оперативен оддел на главниот штаб на оружените сили на Русија, истакна дека 93 отсто од Луганск и 54 отсто од Доњецк се под руска контрола.
„Русија уништи голем дел од украинското воено воздухопловство и морнарица и тоа означува успешен крај на првата фаза на конфликтот“, порача Рудској.
Но, Министерството за одбрана не исклучува можност за освојување на украинските градови кои се наоѓаат под блокада и уште еднаш нагласи дека „Русија веднаш ќе реагира на секој обид за воведување на зона на забранети летови над Украина“, што претседателот Зеленски во повеќе наврати го побара тоа од Западот.
Министерството, исто така, додаде дека Русија ќе продолжи со инвазијата „се додека не бидат постигнати целите што ги постави Путин“, јавува новинарската агенција РИА новости.