Украинските војници во составот на КФОР се подготвени за враќање дома по наредбата на претседателот Володимир Зеленски за итно повлекување на сите војници на Украина од мировните мисии ширум светот, објави порталот Балканска безбедносна мрежа (ББМ).
Зеленски ја издаде наредбата за повлекување на украинските мировни сили на 7 март, но командата на мировната мисија на Косово објави дека украинскиот контингент, сепак, ќе остане во земјата.
Мрежата на својата интернет страница balkansec.net, повикувајќи се на медиумиуте во Приштина, наведе дека неименуван офицер на КФОР рекол оти „Украинците ќе продолжат со својата мисија на Косово“.
По повеќенеделно одложување, „тешката ситуација по украинската војска го направи безмислено задржувањето на обучен персонал надвор од земјата“, наведува ББМ.
Откако стана извесно дека украинските војници, сепак, ќе ги напуштат меѓународните сили на Косово, се отвора прашањето како ќе се изведе повлекувањето – со борбена техника и теренски возила по копнен пат до Полска или Романија или со авион без техника и возила?
Мрежата ББМ наведува дека украинските војници во составот на КФОР користат модифицирани возила „Хамви“ (Humvee) од американска донација кои се преработени во машинско-ремонтниот завод во Лвов. Станува збор за теренци од типот М1097A со кабина за два члена на екипаж и товарен дел за уште осум лица.
Во внатрешноста на возилото имаат заштита од панцирни плочи за противпешадиско оружје кои се тешки 1,2 тона и вооружени со митралез со калибар 12,7 мм. на кровот кој се врти во цел круг. Во базата „Бондстил“ кај Урошевац се стационирани 40 украински војници, а оперативно се ангажирани во источниот дел на Косово.