Во несреќата којашто се случи утринава во рудникот за јаглен “Соко” кај Сокобања загинале осум рудари, а 18 се повредени, потврди претпладнево српското Министерство за рударство и енергетика. Најмладиот настрадан работник има 31 година, а најстариот 59.
Саша Спасиќ, директор на ЈП ПЕУ Ресавица, изјавил дека рударската несреќа во јамата на рудникот “Соко“, се случила по четири часот изутрина, во трета смена, во делот на наоѓалиштето на рудникот Источно поле, за време на редовните работи на експлоатација на јаглен, пренесува blic.rs.
– Според се уште неофицијални информации, се случило пропаѓање на јагленот во комората ВЕ 3/1 и ненадеен продор на метан во работниот простор. Изразувам сочувство на семејствата на настраданите рудари, изјавил Спасиќ.
Во несреќата загинале рударите, Д. З. (43), Н.Т. (37), Р.Г. (47), П.П. (31), Б. Ч. (56), Б. З. (55), Б.Ж. (59) и Б.С. (34). Останатите, коишто во часот на несреќата се наоѓале во окното, се извлечени и на повредените им се укажува лекарска помош. Рударски инспектор и други надлежни органи ја испитуваат причината за несреќата.
Драго Милинковиќ, директор на рудникот „Соко“, изјави дека рудникот изгубил осум вредни работници и изјави сочувство на семејствата на настраданите рудари.
– Мерките на безбедност коишто ги преземаме во рудникот се на највисоко ниво, но овојпат се случи нагло издвојување на метанот и не можевме ништо да сториме – вели Милинковиќ.