Американскиот Сенат ја потврди Кетанџи Браун Џексон (51) како прва црна судијка во историјата на Врховниот суд. Џексон беше номинирана од претседателот на САД, Џо Бајден. Нејзината кандидатура ја поддржаа 53 застапници, а 47 беа против. Тројца републиканци – Сузан Колинс, Лиза Мурковски и Мет Ромни се придружија на демократите и ја поддржаа Џексон за функцијата за што ѝ требаше просто мнозинство.
Џексон во Врховниот суд на САД доаѓа на местото на 83-годишниот Стивен Брејер во либералниот блок на судот. Брејер ќе биде на позицијата до истек на мандатот што вообичаено завршува на крајот на јуни, по што Џексон и официјално ќе го заземе своето место. Таа на почетокот на кариерата работеше како службеничка токму кај Брејер.
Од 115 судии во американскиот Врховен суд од неговото формирање во 1789 година, само двајца досега биле црни судии – Кларенс Томас кој беше именуван во 1991 година и сè уште е во служба и Тургуд Маршал кој истата година се пензионира. Судијката Сониа Сотомајор, пак, е единствена личност со латиноамериканско потекло во судот.
Џексон е шеста жена во Врховниот суд и ќе се придружи на актуелните колешки – Емо Кони Берет, Елени Кеган и Сониа Сотомајор, пензионираната Сандра Деј О’Конор и покојната Рут Бејдер Гинсбург.
Претседателските номинации за Врховниот суд станаа жариште во американската политика. Судот има силно влијание во обликување на американската политика за „жешки“ прашања како абортусот, вооружувањето, законот за гласачко право, правата на ЛГБТ заедницата, верските слободи, смртната казна.