По долго боледување денеска во Скопје почина Митко Мустачки Сокол. Соколот, како што го викаа неговите пријатели и музичари, беше познат гитарист на повеќе рок состави, меѓу кои и на Долар и Карамела.
Тој во еден период водеше и музичка те ве емисија со наслов „Старите добри времиња“ во кои, користејќи ја својата исклучително богата видео и аудио архива, направи вистински времеплов на добрата музика од македонските, поранешните ју простори и од светот.
Групата „Карамела“ е една од позначајните во македонската музичка сцена. Оформена е во почетокот на осумдесеттите години на минатиот век, по водство на гитаристот Митко Мустачки Сокол. Првата формација на „Карамела“, покрај Сокол, ја сочинуваат уште и вокалистот Стојанчо Андонов-Тонка, басистот Слободан Капевски и тапанарот Љупчо Димитиевски-Семо. Бендот правеше музика под влијание на хардрокот од 1970-тите години, притоа внесувајќи малку помодерен метал-звук, со што креираше свој препознатлив звук, во кој предничеше токму несекојдневното и иновативно гитарско музицирање на Митко Мустачки-Сокол. Практично, „Карамела“ е еден од првите македонски метал-бендови што подоцна ѝ ја отворија вратата и ѝ го трасираа патот на помладата генерација што се интересираше за овој музички жанр. Нивни најпознати синглови од тоа време се песните „Дај ми нешто моќно“ и „Би сакал“, кои станаа генерациски химни.
Неговите колеги од музичката сцена неодамна организираа и хуманитарен концерт за финансиска поддршка на лекувањето, но болеста, за жал, беше посилна од големата волја на Соколот, неговите најблиски и другарите. Митко Мустачки Сокол остави силна трага на македонската рок сцена со своето одлично свирење на електрична гитара.