Ако овој викенд патот ве носи во Брисел, не ја пропуштајте оваа спектакуларна туристичка атракција која се одржува секои две години. На величествениот централен плоштад во Брисел, кој го носи едноставното име Гран Плас, овој викенд е распослан тепих од цвеќе. На секои две години мотивот на цветниот тепих се менува а оваа година тоа е турски ќилим, посветен на 50 годишнината од турската имиграција во Белгија.
Бегониите и далиите цртаат традиционални турски мотиви во прекрасни бои од зелено, бело, портокалово, црвено, жолто….
Турскиот тепих годинава е 75 метри долг и 25 метри широк со 1.800 квадратни метри цвеќиња. Доброволците работат врз цртеж испишан на плочите на Гран Плас направен на микроперфорирана пластика и поставена врз тенок слој песок.
Овој август Брисел мора да трпи лошо време со многу дожд. Но, креаторите на ќилимот се задоволни. Велат дека за цвеќињата е подобро кога врне отколку кога е голема горештина.
“Кога е жешко е практично невозможно да се одржат цвеќињата кои горат на топлото. Дождот е добар но се надеваме дека во текот на овој викенд нема да имаме големо невреме кое би донело град”, велат оние што го поставуваа ќилимот. За сега се чини дека имаат среќа. Нема многу сонце а дождот одлучи да не биде многу силен. Ветерот, кој може да ги однесе латиците на цвеќињата, одлучи да ги поштеди.
Ќилимот беше поставен како да е вез во четвртокот и 120 доброволци беа ангажирани во деликатната работа. Ќилимот е реализиран од асоцијацијата “Тепихот на Брисел” која вели дека цвеќињата се нарачуваат две години пред реализацијата на тепихот бидејќи ги има стотици милиони.
Ова е по 19 пат да се реализира овој тепих. Според одговорните за бриселскиот туризам ова е една од најпривлечните туристички атракции. Секоја втора година телевизиите од целиот свет бараат дозвола да го сликаат тепихот а најревносни се Кинезите, Јапонците и Русите. Разгледницата со тепихот е една од најпознатите. Многу туристи го темпираат своето доаѓање во Брисел токму за викендот на цветниот ќилим. Навечер градот организира и спектакл од светло и музика кој му дава посебна волшебна атмосфера на бриселскиот плоштад и неговиот времен украс.