Во Управата за финансиска полиција се постапува по наредба добиена од страна на јавен обвинител од Основното јавно обвинителство за гонење на организиран криминал и корупција, по која се вршат проверки, и сите тие проверки на крај ќе резултираат со исход кој ќе покаже зошто имотот на „Трансмет“ не можел да биде конфискуван, вели директорот на Управата за финансиска полиција, Арафат Муареми, во интервју за порталот Локално.
Тој во интервјуто посочува дека на барање на Финансиската полиција Основниот граѓански суд им ја доставил целокупната документација од стечајниот предмет, како и дел од предметите кои се водат пред истиот суд, а каде како странки се Државното правобранителство и фирмата „Трансмет“. Документацијата, вели Муареми, во овој момент се анализира и за тоа што ќе го констатира финансиската полиција ќе биде известено јавното обвинителството.
Зборувајќи за кривичната пријава што Државното правобранителство ја поднесе против него и против двајца поранешни обвинители на Специјалното јавно обвинтелство, Муареми вели дека тој како истражител немал надлежност да отвора истраги ниту пак овластувања да предлага или одлучува дали одреден имот треба да биде предмет на конфискација.
„Би сакал да појаснам дека надлежност на еден истражител е да презема дејствија во насока на откривање и собирање доказен материјал за сторени кривични дела и откривање на сторителите на истиот. Истражителот, согласно одредбите од Законот за кривична постапка, нема надлежност, ниту пак овластување да одлучува дали за одредени утврдени инкриминирани дејствија ќе се отвори истражна постапка или ќе се поведе судска постапка, и следствено на тоа истражителот нема надлежност, ниту овластувања да предлага или одлучува дали одреден имот за којшто постои сомнение дека потекнува од криминални дејствија ќе биде предмет на конфискација“, вели Муареми. (Р.Н.)