Киев ја обвини Русија дека почнала со уцените кон Европа, со прекинот на испораката на гас за Полска и за Бугарија, но и дека се обидува да го разбие единството на сојузниците на Украина.
Како што јавуваат странските агенции, Полска, која е членка на НАТО, е меѓу европските земји што бараат најстроги можни санкции против Русија, поради инвазијата на Украина. Бугарија, исто така членка на Алијансата, речиси е во целост зависна од увозот на рускиот гас.
Андриј Јермак, шефот на кабинетот на украинскиот претседател, Володимир Зеленски, смета дека Русија „почнува со гасна уцена“.
„Русија се обидува да го разбие единството на нашите сојузници. Земјата, исто така, докажува дека енергетските ресурси се оружје. Затоа Европската Унија треба да биде обединета и да воведе ембарго на енергетски ресурси, одземајќи им го на Русите нивното енергетско оружје“, изјави Јермак.
Рускиот претседател Владимир Путин побара „непријателските“ земји да плаќаат за гас во рубљи, што досега е прифатено од само неколку купувачи.